MARÍA MARIÑO, HOMENAXEADA DO DÍA DAS LETRAS GALEGAS 2007

Muller comprometida ca igualdade de xénero e loitadora en prol dos dereitos da muller.

No centenario do seu nacemento, que se celebrará en 2007, o plenario da Real Academia Galega decidiu, na súa reunión do venres 7 de xullo, dedicar o Día das Letras Galegas do ano 2007 á poeta noiesa María Mariño Carou, "unha figura que aínda hoxe é preciso descubrir porque as circunstancias sociais e persoais nas que viviu fan que a súa poesía sexa de difícil acceso para o gran público".

Naceu en Noia no ano 1907. Filla de Xosé María Mariño e Filomena Carou, era a cuarta de cinco irmáns. A súa infancia e xuventude nesta localidade están marcadas polas dificultades económicas da familia, uns anos -poucos- de escola e logo traballa como costureira polas casas. As amigas lémbrana como unha persoa estraña e solitaria. O traslado a Escarabote (Boiro), onde unha tía súa traballaba de cociñeira no Pazo de Goián, que tiña unha boa biblioteca, permítelle o acceso a algunhas lecturas. Ese descoñecemento da cultura libresca é un dos aspectos subliñados por Uxío Novoneyra, ao insistir na orixinalidade da súa escrita.
Nun comunicado, a RAG destacou que a obra literaria de María Mariño, falecida en Parada de Courel no 1967, está marcada polas circunstancias vitais que a rodearon, de tal xeito que a súa condición de muller e a pertenza á clase humilde fixeron que o acceso á cultura fose francamente difícil. A súa poesía inspírase na tradición popular "onde non é allea a inevitable presenza de Rosalía de Castro", e enríquecese coa intimidade profunda dunha muller madura.

Coloquio sobre a figura de Maria Mariño, a que se lle adica o Dia das Letras Galegas 2007